Jumat, 05 November 2010

Mamasuhi bagas Pak omi

TERTIB ACARA MAMASUHI BAGAS
Keluarga
S.H.Lumbantobing,S.Pd/S.Hutagalung,S.Pd
Minggu, 24 Januari 2010

Hatorangan:
U = Uluan; Kel = Keluarga; N = Natoras ni namamasuhi bagas (Kel. Tobing dohot hutagalung); HL= Hula-hula; HS/DT = Hasuhuton dohot dongan tubu; Br = Pamoruon; DS/A = Dongan Sahuta dohot Ale-ale.

I. Acara Ibadah
01. Hata Patujolo dohot Parhorasan
Prelidium : Musik (Song Liders) mangendehon “How Great Thou Art”
O Lord my God when I in awe some wonder conseider all the worlds Thy hends have made. I see the stars, I hear the rolling thunder, The pow’r throughout the universe displayed.
Reff.: Then sing my soul my Saviour God, to Thee, How great thou Art, how great Thou Art. Then sing my soul my Saviour God, to Thee, How great thou Art, how great Thou Art.

O Tuhanku, bila kuterpesona merenungkan ciptaanMu, semua. Kusaksikan bintang guruh angkasa, tanda kebesaranMu di dunia.
Reff.. Aku memuji kebesaranMu, Ajaib Tuhan, ajaib Tuhan. Aku memuji kebesaranMu, Ajaib Tuhan, ajaib Tuhan.

U : Hamu angka dongan sahaporseaon di bagasan Goar ni Tuhanta Jesus Kristus! Ari las ni roha do di hita sadari on, ala asi ni roha dohot basa-basa ni Debata na jinalo ni keluarga S.H. Lumbantobing/ br.Hutagalung na patupa partangiangan mamasuki sibaganding tua sadarion. Hupangido hami ma saluhutna na niontang ni suhut sihabolonon on asa rap hita manangiangkon dibagasan rohanta, asa dibagasan hahipason nasida manginganton bagas nasida mulai sadarion sahat tu ari nanaeng bolousonna dope.

Kel. : Horas ma di hamu angka amang dohot inanami ro di saluhut na hugonghon jala hupio hami tu ulaon partangiangan mamasuhi bagasnami sadarion. Anggiat ma dibagasan dame dohot sonang ni roha hamu mandohoti partangiangan mamasuhi bagasnami sadarion. Laos hupangido hami ma asa dohot hamu manangianghon hami na marulaon on, asa tung sonang hami manginganton sibaganding tua on. Mauliate ma di haroromuna sude.

S : Mauliate ma tutu di Tuhanta Jesus Kristus na mangiring-iring jala manogu-nogu dohot mamasumasu amanta/inanta dohot saluhut keluarga nasida, pola boi jongjong sibaganding tua on dibagasan las niroha. horas ma hamu manginganton bagas sibaganding tua on, Mardangka bulung bira martampuk bulung labu; Mauliate ma di Tuhan ai nunga tipak hamu marjabu. Tuhanta ma na mamasumasu hamu rodi sude ianangkon muna dohot ulaon muna.
U : Na pungu do hita di adopan ni Debata, na sun Rap dohot sude angka jolma na porsea di Ibana di sandok portibion, tapuji jala tapasangap ma Debatanta Parasiroha i, marhite ende sian buku ende No. 125 : 1.3 BL. 82

♫ Marlas ni roha hita on, mamuji Debata Ai asi ni rohaNa i, do bongot tu rohanta i Umbaen nuaeng mardomu i, dison sadarion dison sadarion

♫ Alai taingot ma huhut, mambaen Sangap tongtong Barita ni Tuhanta i, marhite parangenta i Di jolo ni Tuhanta i di atas tano on, di atas tano on.

02. Votum – Introitus – Tangiang
U : Marhite-hite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on.

S : Amen

U : Puji ma Jahowa, hamu ale angka na mangkabiari Ibana, sude pinompar ni si Jakkob pasangaphon Ibana, jala sude pinompar ni Israel mangkormat Ibana!

Kel. : Puji ma Jahowa, ale tondingku, jala nasa rohangku di bagasan mamuji goarna na badia i.

U : Puji ma Jahowa, hamu ale angka surusuruanna, hamu ale angka ulubalang na gogo, angka na patupahon hatana, di na tinangihonmuna soara ni hatana i!

N : Puji ma Jahowa, ale tondingku! Na bolon situtu do Ho, ale Jahowa Debatangku, marpangkean hasangapon dohot hamuliaon do Ho.

S : Halleluya! Puji ma Jahowa, hamu ale angka sian banua ginjang, puji hamu Ibana di angka banua ginjang!

U : Ibana pamahap roham marhite denggan basa, asa mulak poso ho songon pidong rajawali.

S : Parasi roha jala pardenggan basa do Jahowa, ro di saleleng ni lelengna do asi ni rohaNa, di angka na manghabiari Ibana.

U : Dai jala ida ma denggan basa ni Jahowa, martua ma manang ise na marhaposan tu Ibana, AMEN. Martangiang ma hita! Ale, Jahowa Debata, Amanami di bagasan Goar ni Tuhan Jesus Kristus! Mandok mauliate do hami sadarion di godang ni pasu-pasu dohot basa-basaM, na hujalo hami di bagasan ngolunami. Buas do Ho, mangelehon nasa na ringkot i; diramoti jala diparmudumudu Ho do ngolunami be, lumobi keluarga ni amanami S.H.Lumbantobing/br.Hutagalung (Bapak Naomi), pajongjonghon sibaganding tua nasida, jala mamongoti dibagasan sadarion. Ndang hasuhatan tahe denggan basa dohot asi ni rohaM, naung jinalonasida saleleng di ngoluna; diiring-iring jala dipargogoi Ho do nasida mamolus ragam ni hamaolon, parungkilon, arsak dohot lan na paet. Dibalik ni angka na paet i, marsorin-sorin do nang na uli, na tonggi, las ni roha jala pasu-pasu. Dipalumehon Ho di nasida sada anak dohot opat boru; di pasu-pasu Ho ulaonna. Tung sirsir do basa-basaMi dingolu nasida. Mauliate ma di Ho, ale Tuhan. Pasu-pasu ma bisuk dohot hapistaran di nasida saluhutna. Songon i nasida na manginganton sibaganding tua nasida on, bahen bagas on, gabe bagas manaringoti hatam, bagas partangiangan bagas partahian ni natua-tua, bagas hasorangan ni nauli, hasorangan ni anak dohot boru, bagas partamueon. Jala bahen bagas on gabe bagas na gok dame di pangisina gok hahipason dohot bisuk. Padao ma tahi ni angka parjahat, Ho ma mamagari sian sumbian ni sibolis. Ho ma mangaromiti nasida molo ruar sian bagas on, jala manomu-nomu molo laho masuk pe tu bagas on. Ale Debata husangap hami ma Ho dibagasan Kristus Jesus Tuhannami. Amen.

03. Marende BE No. 327 : 2 (Aut na saribu hali ganda) BL.103
♫ Hupuji Ho, o Debatangku! Mauliate au di Ho, Dibaen sude na nilehonmu, di au huhut huboto do, Las do roham di endengki, marhitehite Jesus i.

04. Renungan Situasional
U : Sadari on, marningot do hamu keluarga di pasu-pasu ni Debata, na mangaloas hamu pajongjong bagas sibaganding tua muna on huhut mamasuhi dibagasan tingki on. Antong dia do panindangionmuna di basa-basa ni Debata?

Kel : Dipuji rohangku do Debata ala sude denggan ni basaNa naung hujalo hami, diudut do hosanami boi tulus paulihon dohot mamasuhi bagas on. Mauliate ma di Debata, ala hipas-hipas do hami mamolus sude angka na masa di pardalanan ni ngolunami; di lehon Debata do di hami habisuhon dohot hapistaran, songon i nang sada ni roha, nang hadameon, dipatiur saluhut angka ulaon nami dohot na sinangkapan ni rohanami, ido umbahen boi tamasuhi bagas on sadarion. Pinuji ma goar ni Tuhanta parholong i.

U : Godang ma tongon basabasa ni Tuhanta di hamu. Antong dia ma bilang-bilang ni rohamu keluarga taringot tu angka na masa i saluhutna?

Kel : Anggo mamereng godang ni parungkilon, sitaonon dohot pergumulan ni ngolu nami saleleng di hasiangan on, tung mansai tahutan jala monditondit do roha nami nian. Ndang hurang arsak, lomos, ganggu ni roha na boi manggugai pingkiran dohot tondi nami; marsorin-sorin do hamaolon dohot las ni roha, na paet dohot na tonggi, arsak dohot parsaulian hubolus hami. Songon hopal na mardalan di tonga ni laut huhilala, sipata ditompas alogo, udan haba-haba dohot halisungsung do ngolunami; ragam parmaraan na mandosak hami mambahen talu jala tinggang. Alai, tau do hami jala benget di saluhutna i. Hurajumi hami do i pasu-pasu ni Debata, mauliate ma di Debata pardenggan basa i!

N : Nang di hamu amang, inang nang pahompunami. Mansai las do rohanami paida-ida hamu, ai hubereng hami sada jala dos do rohamuna mandalani ari-arimuna. Godang do na hansit dibolus hamu, pagodang-godang angka pahompunami, di ulaonmuna pe, sahat tu na paulihon sibaganding tuamuna on. Tutu hurang singkop do pamodaionnami dohot pangurupionnami di hamu, alai ndang manghurangi sangapnami songon natoras di bahen hamu. Songon tanda las ni rohanami sadarion tangiangnami ma songo siluanami, asa Debata na manggomgom tondi pamatangmuna manginganton bagas sibaganding tua muna on. Dao ma angka panahit, dao angka pangago, alai dipasupasu ma hamu manang di saluhut gulmit ni ngolumuna.

05. Tangiang sian Natuatua ni amanta S.H. Lumbantobing

06. Marende BE No. 06 : 4 (Puji Jahowa na Sangap) BL. 56
♫ Puji Jahowa situmpak sude ulaonmu; Ai ditumpakhon tu ho tongtong hngoluanmu, ingot ma i denggan basaNa do i, tomu-tomuna sambing do.
07. Renungan di panogunoguon ni Debata
U : Di naung tabege panindangion ni keluarga na mamasuhi bagas na sadarion. Nalnal do disi pangaramotion ni Debata di sandok pardalanan ni ngolunasida. Alai naeng do tangkas ojahan ni hajongjongan ni bagas nasida on. hombar tu hata ni Debata na mandok:

S : Ai ndang tarpauli ojahan na asing, dungkon ni naung ojak i, i ma Jesus Kristus i.

U : Ai dipauliuli do hamu diatas ojahan ni angka apostel dohot panurirang; Kristus Jesus sandiri do batu parsuhisuhi disi.

HL : Ai dipaimaima do bagas na marojahan na hot, na pinandean jala na pinauli ni Debata.

HS/DT : Tudoshon hau anggur na marparbue do ianggo jolmam di bagasan angka bilut ni jabum, tudoshon tunas ni hau jetun do angka anakmu humaliang mejam.

DS/A: Antong, hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna.

Br : Manginona do torutoru ni Jahowa tu jabu ni parjahat, alai dipasupasu do ianggo undungundung ni halak partigor.

U : Hapistaran ni angka parompuan pajongjong jabuna, alai anggo na oto, laos tanganna sandiri mangalohaisa.

HL : Dengganan maringan iba di halongonan, asa marsajabu dohot parompuan parbadabada dohot na murhing.
HS/DT : Arta na arga dohot miak na hushus do di jabu ni halak na pistar, alai anggo jolma na oto mansuasaehonsa do.

S : Binahen ni gurbak ni ulu jomba angka parhau ni bagas, jala binahen ni hagaleon ni tangan, tiris jabu i.

U : Nda on do, dihalomohon Debata sian ho, molo diponggoli ho rotim tu halak na male, jala ditogihon ho tu jabum halak na dangol dohot panangkarnangkar? Molo diida ho halak na marsaemara, gabe diabiti ho ibana, jala ndang martabuni ho maradophon sibukmu.

Br : Anggo dijagai ulubalang na gopas marsinjata jabuna, sinok ma ugasanna.

U : Alai molo tung sogo rohamuna mangoloi Jahowa, pillit hamu ma sadarion manang ise naeng oloanmuna, manang debata sileban angka na nioloan ni ompumuna di bariba ni batang aek i, manang debata ni halak Amori nampuna tano na niingananmuna i!

Kel : Alai anggo ahu dohot donganku sajabu, ingkon Jahowa do oloannami..

08. Tangiang Pangondianon sian Hutagalung (Hula-hula)

09. Marende BE No. 299 : 5 (Debata do manggomgomi) Bl. 86
♫ Togu au ale Tuhanku, mangihuthon hatami. Saipature ma langkangku, asa tung hasea i. Sai ramoti ma au on, asa sonang rohangkon.

10. Jamita
11. Marende BE No. 186 :1….(Tongtong tutu na denggan do) BL.173 (huhut papungu pelean tu huria)
♫ Jahowa do haposanki, na mangapoi rohangku, napatiurhon dalanki, bulus dibahen langkangku. Sonang tongtong, rohangkinon, binaen ni Debatangku, patikna do lomongku.
♫ Na tau haposan situtu, do Ho, o Debatangku! Ai Ho do na tongtong burju, mambaen hangoluanku. Na gogo Ho; sai tulus do, sinangkap ni rohamu. Pasaut na pinungkaMu.
♫ Ndang dung dihalupahon Ho, sude na holong roha di Ho; ai sai dapotsa do na tau apul-apulna. Tung sonang do, dibahen Ho, na sai tongtong porsea, malua sian jea.

12. Parsuruon tu ngolu siapari – Tangiang Pelean – Ale Amanami – Pasupasu.
U : Molo tapatupa partangiangan mamasuhi bagas on, ndada nanaeng manghalindangkon na adong hamu keluarga, asa diboto jolma na liat na lolo on hinadeak ni sinadonganmuna. Alai naeng mananda basa-basa dohot panarihon ni roha ni Debata do di hamu di ngolumuna saleleng on, Hata ni Tuhanta mandok :

S : “Jadi marlas ni roha ma ho mida Jahowa, jala ahu manogu-nogu ho di atas ni angka buntul-buntul ni tano on, jala parmudumuduonku ma ho..”

U : I pe ingani hamu ma bagas on, borhat ma hamu tu ngolu siaparimuna, dalani ma ari-ari ni ngolum jala haposi Debata. Torang ma roham, gara haporseaonmu, jala tiurma roham mandalani tingki na pinasahat ni Debata tu hamu. Unang solsoli Debata ua tung aeonmu dope hamaolon tu joloan on, nang pe torop manghaliangi ho, alai Tuhan Jahowa dibagansan Jesus Kristus dohot Tondi Porbadia do tongtong mandongani hamu.
U : Tapasahat ma pelean na tapapunguon tu Debata martangiang ma hita! Ale, Debata, Amanami na dibanua ginjang…………….d.u! Amen, rap mangido ma hita ditangiang na ni ajarhon ni Kristus Jesus tu hita!

S : Ale Amanami…………d.u. Amen
U : Pasahat tangiang pasu-pasu!

II. Hata Huhuasi – Ulaon na hombar (Hasuhuton)






































Thema : Dapotan tua do pangisi ni jabu on sadari on

Aek Siansimun-Tarutung

Tidak ada komentar:

Posting Komentar